i duh zawng chhin la

Thursday, June 28, 2012

MIPA TANA HMEICHHE SAM


Hmeichhiate siamtu i hnenah lawmthu ka sawi e

Mipa-hmeichhia leh palchhia tehkhin fotute hnenah hian anmahniin an zir chuang loh chuan an hmeichhiate hi pawngpaw thlak ngawt fo theih an ni bik lo tih hriattir la, palchhia pawh pal tur bungrua neih hmasak a ngai tih hriattirin palhung tura tha a lo berah tlem tal thawh a ngai ve tho tih hriat tir ang che. A nazawnga thlak tum mipa chu nun pawh zahlo mipa an nih rualin an thlakna hmeichhia pawh chu hmeichhe heti zat awmzinga a fing fel ber ber an ni thei dawn em ni tih zawhna chhanna hi min lo hrilhsak nghal ta che?

Hmeichhiate siamtu i hnenah lawmthu awm rawh se

Hmeichhia leh ui te tehkhin fotu te hnenah hian ui an siam thiam leh thiam loh min zawh sak la, an lo thiam ta a nih pawhin bauh aia tama an tawngtir theihloh chuan pawm sak chuang suh ang che. Ui ang maia hmeichhiate buma chaih buai duhfona thinlung nei khawpa rilru chhia mipa chu a letin hem ang che


Hmeichhiate siamthu lo ropui ber ang che.

Tluksual chang a thlenna zawnga hmeichhiate puh fotu mipa hi engtia tihchi nge mawnile? hmeichhiate chhuah tam avanga hhmeichhiate deu hrat mipa ho rilru ah hian eng lunghlu tak awm ang maw? Heng mipa te hian hmeichhe khuahkhirh theilo khawpa nep an mipatpuite an awm ve reng a ni tih hriattir la,mipa chu hmeichhe lu a nih angin hruaituin a tih tur leh a tih thin tlem tal hre tura finna thinlung pe ang che

Hmeichhe siamtu nang ngei hi fakin awm zel ang che

“Mihringte anchhedawnga anlo awmna chhan chu hmeichhiate a ni” tia awr phiar a rak rak ho vanneih zia hi tiraw? Kha thei kha mipa zawk khan lo ei ta se a mihringpui hmeichhia pe lo khan ngawi rengin amah chauhin a ei ang a-amah chauha anchhedawnga awm tur kha a ni si a. Hmeichhia zawkin a lo ei hlauh kha a fuh mang e. H”etah chuan mipa leh hmeichhia kan intluk tlang si a

Hmeichhe siamtu nang lo langsar ber ang che

Hmeichhe finin tuikhur ral a kai lo” tia iak iak ho hnenah hian thaibawih chungchanga mipa mawhphurna lo hriat tir ang che. Hmeichhe thluaka kawlhsenna ai maha mipa thluaka hruaitu nihna i peksa leh i dahsa hmangthiamlo khawpa a leh manganthlak mipa an la awm hi a vanduaithlak letling zawk tih an hriat huna an zak lutuk tur erawh ka khawngaih viau asin

Hmeichhe siamtu nang lo mawi zel ang che

Hmeichhe mawina aia sal an nihna hmusang zawktu mipa te, hmeichhiate hi mamawhna aia duhna dah sang zawkte hi kohranin thunun nachang hria se zawng hmeichhe an chak heti zat an awmlo maithei asin. An awmlo ang chu ka ti ngam bik miah chuang lo naa..

Hmeichhe siamtu i finna thukzia leh zauzia hi!

Mipa hmneichhiate diklohna leh an thatlohna te, an chaklohna leh an nepna sawi fotu mipa chu anchhedawngin awm ta se a pawi em? hmeichhia a aia chaklo zawk a nihnaa a hlutna hriaa zilhhau nachang hrelo mipa chu talhfiak nena um tlakloh mah ni se a chungah zah ngai la a thluaka chhia leh tha hriatna i pek chu hmang ve ngam tur khawpa mi huaisen a nih theih dan ka dil sak e


Hmeichhiate siamtu nang fakin awm zel ang che

“Hmeichhia leh chakaiin sakhua an nei lo” tia tukhum pawng pawp pawp khawpa la rak peih ho hi engtia tihchi nge mawni dawn ni! Hmeichhiate tluka mipa hnena intulut duh mihring an awmloh avanga lawma tlang aia sanga zuang tawr tawr tur an nih laia hetia an lo auh ve sek avang hian hrem tlak an va ni teh lul em! En teh! Hmeichhe siamtu, mipa tan hian zahngaihna ka dil sak che a, an mawl ang anga hrem mai lova an finna ang ang hmanthiam dan min hrilh sak hram ta che

Hmeichhiate siamtu hlimna i siam avangin chawimawi ni ang che

Hmeichhe khukna mual tur hriat a nih loh avanga duh duha hmeichhe hnuh kual tum ho hi an tukhum vir pawp khawpa pet leng pawp tur rawih tur awmse zawng i hmaiih bik ka ring hauh lo. Mahni in leh lo chhuahsana chenpui ngailohte hrula tal thei khawpa huaisen leh dawhthei hmeichhia hi awmlo ta se zawng khawvel hi a hawihil ve viau a nia ka rin ni!

Hmeichhe siamtu i finna hian chhuan zawng zawng daih rawh se

Hmeichhe mawngah leh chappui mawngah pa an awm mai mai thei lo tih sawi nachang hria mipa fing an lo awm avang te, Hmeichhe zangthal leh thing zangthal chu zuam sual an awl tih nachang hre khawpa mipa hlei an lo awm avang te leh Hmeichhia hi chu hmin sa pu tia rak ral mai mai nachang hre khawpa mipa awmmawh i siama avangte hian i finna hi tumah rengin an chelh thei lo a nih hi! Anni hi awm talo se zawng hmeichhiate hian mipa tlankhalh tum reng rengin kan hmanhlel ang a, an kuthleina thiehnghilh thak khawpin rah hrual kan tum palh ang!

Hmeichhe siamtu nang zawng i mawina hi sawi loh theih pawh a ni lo.

En teh! Khawvel chhung zawng zawng a mipa heti zat zinga “Hmeithai thu” tia ner ner ho hian hmeithai thu an tih ve sek avanga fing ta viaua an inngai hi an khawngaihthlak tiraw?  Chuta karah “Hmeichhe thu thu ni suh, chakai sa sa ni suh” te chu an la ti ta deuh deuh. Hetianga nilenga rak rak ho hi chu changpat chehchhum ang mai hian an tei an tei ang a, an tal hat huat ang a, fing aw, dehin an pen chhut chhut ang a, an tumlohna deuhah an tum luh thut a nia ka rin ni!  Hmeichhe thu dawn mai mai tia vaupung tina ringawt mipa te hi lo ngaidan hram hram mai ta che. “Hmeichhe thudawn” avanga mipa fing ta te, an kawngzawh fuhta te pawh hi duh taka I siam leh i enkawl ve tho an nih kha


Aw! hmeichhe siamtu i ngaihtuahna ropui tak avang hian i ropuina chu zual zel teh se

“Hmeichhe vau loh leh vau vau loh chu an pawng tual tual” ti a tep chap chap a, chil lem sek sek paha titi zuap zuap thin mipa ho hian eng tak maw an vau chhuah ang aw ka ti thin. Lo hrethiam la ka tih rualin hmeichhe ho hian i hrethiam teh ang u; anni zawng chhukah pawh chho zawnga kal  talh tum kha an ni si a le! chutah “Hmeichhia leh uipui chu lo rum lungawi ve mai mai rawh se” tiin kamchhe tleuh nan an la hmang zui! Aw!siamtu hmeichhe thinlung i siam dana a sak that zia leh a khauhzia a nazawnga tilang mai mai lo leh midang tana hnawksak loa an inphun lungawi duh mah hi chu mipa ho hian vankaia banphar a,dang fawn hlawrh hlawrh khawpa fak tur che an ni tih i hriat kha!

Hmeichhe siamtu i lakah hian kan lung a va’n awi em!

“Hmeichhia leh thlawhhma chu pawm mawi” tia rak rak duh mipa fel leh fing i lo siam hi chu i tih fuh thlawt e.  A pianna chhungkua tur thlang theiilo khawpa dinhmun dawrawm mihring chuan a dawmliamtu pawh thlan na hun nek lo i! a damchhung huna a hun tawn rei ber puitlin huna a duhthlan naa hetiang mipa thlanna chang hria hmeichhe fing i lo siam avang hian lung I ti awi e! Lal lungawina ni zel ang che

Hmeichhe siamtu nang chu chawisanin lo awm zel ang che

“Hmeithai bangpui tah” thu sawi sawi mipa te hian an mipat pui te an ti mualpho a ni tih pawh an inhre leh pek tawp nang! Nang zawng siamtu a dawha dawhthei ta ngang I ni bawk a lo dawh leh hram hram la ka va’n ti em! Hmeithaiin dap an tahin a tunglam a lang tam zawk a ni tihhre turin  tah tir chhin eih lo se engtin nge he thu sawichhuak hmasa bertu hian a hriat teh lul ang! Hmeichhe bangpui tah tir duh khawpa mipa rilru rilru chhia leh thatchhia chu a hremdan i ngaihtuah tawh kha! Mahse tun tum pawh hi zahngaihna ka dil sak leh hram ang

Hmeichhe siamtu nang lo dikber zel fo ang che

Mihring tungchho reng rengte hi eng ang mi pawh nise zahawmna an hnenah i bel a ni tih theihnghilh thei mipa te thusawi chu i hria em? “Nula hnute dehin lei a kuai” lo titu mipa chu tumthang hnah tla ang chiah an ni! an awm paw’n engmah a sawt lo a, an awmloh paw’n chuti tho. Chutah Hmeichhe puan ven hnan theih tiin an la sawi titih mah mah! Hmeichhia chu rilru nem leh midang khawngaih theia i siam kha an tan tho a ni tih an hrelo nge ngaihtuah nachang an hre lo zawk le ka ti. Hmeichhia va nawk va nawk ta na na na chuan nawk chhuah hun te chu lo nei teh se, thilawmlo pawh a ni lo. Nawk naw naw hmasak loh hmeichhe parh harh hi chu an tam lo asin. A nawktu lah mipa bak la ni zui suh!

Hmeichiate siamtu nang lo eng zual zel ang che

Hmeichhiate mi bika siam an ni tih ti chiang tura hman kawizang i lo ngen tir kher kher kha chu i va’n ti fuh tak em! Duh leh mamawh ngawih ngawih a nei ve tho a , i kalpah siam niloa a duhtaka i siam ve tho an ni tih tih chian nana luhlulna, tumruhna, huaisenna, dawhtheihna leh tih tang tang duhna thinlung i pek avanga “Hmeithai kawizang ngen ang” tih tawngkam rawn chhuak hi a hlu ka tiin a sawitu hian eng thinlung pua sawi pawh lo ni se hmeichhe nihna i hriat nawn tir avangin ka lawm e

Hmeichhe siamtu i themthiamna leh i finna hi chawisan lo ni zel rawh se

Mihring zinga mipa leh hmeichhia chauh i lo siam hi chu a va’n fuh tak em! En teh! Awmlo leh tihloh an sawi an sawi ngailo tih kan hriat mai bakah pan lovah tho a fuk ngailoh kha le. An thil zawn an hmuhloh avanga “Hmeithai zinga zang zawn ang mai” tia teu hlur ho hi I hmu em? Hmeithai zinga zang zawng tawk mipa an lo awm tawh ni ngei tur a ni; chulah chu mipa ho hian zahna chang an hre derlo lehnghal. An thlahtu tuemaw hmeithai zinga zang zawng an awm a ni tih hriaa kun ngawih ngaiwh tur an nih vei nen!

Hmeichhe Siamtu i rorel thiam avangin ka fak a che.

Mipate aia hmeichhiate chhelzia leh hauisen zawk zia min hriattirna tur a hmeichhiate chungah ‘Fahrin theihna’ nen a mal min sawm a vang hian, aw Siamtu, ka fak a che. Mipa thawh rah a vang a nu in thla kaw chhung nau kan pai ang te hi mipa chungah thlen tir ni ta la, hrehawm tih luat vangin ang rak an rak awm si a. Chu mai a la ni ‘nem, fa hring tura na tak tuar a hmangaihna kan hrin chhuah ang te hi tuar ve ta sela, an tuar zo dawn si lo. Hnute tui min pek te chhawr á¹­angkai tur leh hmangaihna leh nunnemna pe chhuak tura mipa te ni lo va, hmeichhiate min thlan a vang hian i rorel thiamah kan fak nawn leh a che.

Aw! Hmeichhe siamtu engtin nge he thu hi khawvel hriatin ka tlangau tak ang le?  Hmeichhia- hmeichhia a nihna anga dawm a zilhhau a, duata hmangaih thiam mipa chu mipa fing a ni tih leh mipa-mipa a nihna anga zah a, duata hmangaih a chawimawi thintu chu hmeichhe fing a ni tih hi.

En teh hmeichhe siamtu-mipa te hi kan chakna an ni tih hrelova sum hmang te, hmelmawina chauh hmanga hmeichhe hlutna teh thin mipa hi engngatinge I lo siam aw tiin ka rum vawng vawng thin; chulah phun thei dihmnah ka ding der silo. Thinlung thianghlim leh chakna a khat hmeichhiate thinlung, khawngaihna leh hmangaihnaa khat hmeichhe rilru, a chakna leh a khakna dahtha fo duh hmeichhe thluak behna taksa hmeichhia hi sum mai maia tehduh mipa chu anchhe hlawh tlak a ni lo vem ni?

Hmeichhe siamtu nang ka tan hlu zel ang che

Keizawng mi zawng zawng lakah hian ka te em a mipa an ka duh hauh lo. Mipa ka nih chuan an thuneihna khawvel awmtirh ata an hnena i pek tawh thamral tir ta mai mai ho ang hian ngawi rengin ka tal ka tal ve palh ang e..

Hmeichhe nui hmel mai mai avanga mipa thinlung lo sosang nasat theih zia te, hmeichhe hmangaihna leh khawngaihna ngah luat avanga mipa lo danglam theih zia te, hmeichhe thinlung nem tak mahse khauh tak si avanga mipa tam tak tlawm a awm ta te, a kianga awm te tana tha ber leh nuam ber a duh avanga a duhthlanna ang ngei pawha awm theilo hmeichhiate hre reng chungin amen!


msi@rose

2 comments:

  1. Replies
    1. st mipate hian hmeichhe chaklona hmachhuanin in ropuina hi in ti hmelhem ang tih a hlahawm asin

      Delete